Khuallian Dr R. Lalthangliana MNF Senior Vice President leh bialtu MLA ni bawk chuan, "Vawiina kum chawhnu hmang mek lokal khawmte hian hlim takin kan hun leh nite kan hman a pawimawh hle a. He lei hi kan awmna hmun nghet tur a ni lo tih hria i la, kan hun hi a tha thei ang berin hmang zel ang u. A lungngai leh a thim zawngin hun thlir loh hram i tum vek bawk ang u. Thangtharte pawhin aia upa zawkte zahthiamin an dinhmun hriat thiam pui i la, dawmkan ngai leh tanpui ngaite i tanpui zel ang u. Kan dam chhung hun hi Lapa tan uluk taka vawng zel turin ka chah duh bawk che u a ni," a ti.

Dr. Thangtea chuan, "Thuneitute pawh hian tun ai hian kum lama upa zawkte dinhmun chawisan a, an tan hamthatna awm thei ang ang pawh ngaihtuahsak a, thil thar tha zawk ngaihtuah chhuahsak hram kan tum tur a ni," a ti bawk.

Dr R. Lalthangliana chuan an sorkar lai khan state sum ni lo, Power Grid Corporation of India atangin cheng nuai 1700 chu Mamit District Hospital sak nan a sawi chhuak a, tha taka an sak zawh thu a sawi a. Tunah pawh Silsuri tan Ambulance thar an neih tep thu a sawi bawk.

 "Aspirational district-a awm kan ni a, state sum ringawt atangin ni lo, a pawimawhna leh a tulna kan sawi thiam chuan central-in min pawmpui theih tur thil tam tak a awm a, ngaihtuahna kan seng mek a ni," a ti.

Dr. Thangtea chuan Dampa bialtu MLA hmasa Pu Rintluanga Sailo pawhin MNF sorkar hun lai daih atang tawha a lo nawr ve reng thin 'Pukzing to Silsuri' inkar kawng km 21 a thui, NESIDs sum atanga cheng vbc 95 senga thawh tur pawh tun thla ni 25 hi PWD lamin an tender atan last date a nih thawh thu a sawi tel bawk.

MNF sokar hun lai daih atanga ruahmanna kal tawh, sum awm sa thawh mai loh chu amah pawhin bialtu MLA thar anihna anga a nawr thu sawiin, tunah thawh theih tura tih a lo ni ta chu lawmawm a ti a, bial chhung hmasawnna nasa tak a thlen dawn a ni, a ti.

Dr R. Lalthangliana chuan New West Phaileng Community Hall-a badminton club tan Carpet a phahsak chu, tukin zing khan a hawnna hun an hmang nghal bawk.